O sector da pesca de Galicia, que abrangue todas as actividades enlazadas coa pesca extractiva, o marisqueo e a acuicultura, continúa a ser un dos primeiros eixos da economía galega.
A peculiar importancia da pesca en Galicia vén condicionada pola súa situación xeográfica, en augas temperadas por mor da súa latitude media, e pola extensión da súa costa, con case 1.500 quilómetros. A primeira destas características, xunto á estrutura xeolóxica da costa formando profundas e numerosas rías, garante unha elevada e variada riqueza de recursos, especialmente mariscos (mexillóns, ameixas, ostras, nécoras, centolas) e aquelas especies de peixe de distribución costeira (como sardiña, xurelo ou pescada). Canto á segunda, a costa galega ofrece moitas zonas apropiadas para usos portuarios e aumenta a zona da plataforma continental, hábitat que buscan moitas especies de peixes.
Por todas estas cousas, o desenvolvemento do sector pesqueiro galego é moi notable, tanto no volume da flota pesqueira (Galicia posúe case o 40% dos navíos españois) como no das estruturas e industrias auxiliares (portos, almacéns frigoríficos e industrias transformadoras). Isto pode explicar que Galicia sexa tamén a principal porta de entrada dos produtos da pesca procedente doutros países. Os principais portos galegos son o de Vigo e o da Coruña.Pero aínda así, a pesca en Galicia ve como vai disminuíndo o número de capturas desde hai anos tanto polo esgotamento das pesquerías tradicionais como polas condicións políticas de acceso ás mesmas. Así, o total da pesca desembarcada está a disminuír, pero mantendo o valor de mercado por mor da suba dos prezos.
En asuntos de economía, a pesca en Galicia representa o 10% do Produto Interior Bruto galego, aínda cando a práctica totalidade desta actividade se concentre lóxicamente na zona costeira. No ano 2004, a facturación deste sector chegou a superar os 1.000 millóns de euros. Representa ademais unha fonte de actividade económica moi diversificada nos sectores industrial e de servizos, ata o punto de que o 12% do emprego galego depende directa ou indirectamente da pesca, o que transforma a Galicia na comunidade europea máis dependente do sector da pesca. A cifra de empregados directos neste sector supera os 25.700, entre mariñeiros, mariscadores e traballadores no sector da acuicultura, e estímase que cada traballo no mar crea catro máis en outras actividades de terra relacionadas co peixe, por exemplo nas industrias conserveiras (ó redor de 12.000 traballadores) e conxeladoras (en torno ós 8.000 traballos).
1 comentario:
é un pouco largo
Publicar un comentario